• Sunday 23rd , April 2017 | आइतवार, बैशाख १०, २०७४

१५ दिनदेखि बन्द गण्डकी मेडिकल कलेजको सेवालाई सुचारु गर्न निर्देशन

पाेखरा, गण्डकी मेडिकल कलेज शिक्षण अस्पताल, पोखरामा कार्यरत चिकित्सकका आन्दोलनका कारण १५ दिनदेखि आकस्मिक बाहेकका सेवा बन्द भएपछि जिल्ला प्रशासन कार्यालय कास्कीले आज अस्पतालको सेवालाई सुचारु गर्न निर्देशन दिएको छ ।

स्वास्थ्य सेवा जस्तो अत्यावश्यकीय सेवामा हड्ताल गर्ने गराउने कार्य गैरकानुनी हुने भन्दै कार्यालयले अत्यावश्यकीय सेवालाई सुचारु गरी व्यवस्थापन र आन्दोलनरत दुबै पक्षबीच वार्ता गरी समस्याको समाधान खोज्न निर्देशन दिएको हो ।

सङ्घर्ष समितिका सचिव तारा कोइरालाले आफूहरूका जायज मागको सम्बोधनका लागि कलेजको व्यवस्थापनलाई एक हप्ता समय दिए पनि मागको बेवास्ता गरिएका कारण दुई सातादेखि आकस्मिक बाहेकका सेवामा असहयोग आन्दोलन गरेको बताए ।

कलेजका प्रमुख कार्यकारी अधिकृत सन्तोष खनालले समस्या समाधानका लागि आन्दोलनरत चिकित्सकसँग तीन हप्ताको समय मागिए पनि उनीहरूले त्यसको बेवास्ता गरी आन्दोलनलाई जारी राखेको बताए । हडतालका कारण अस्पतालमा आउने बिरामीका साथै प्रयोगात्मक परीक्षा दिने विद्यार्थी प्रत्यक्ष मारमा परेको बताउँदै उनले समस्याको समाधान छलफलबाट हुनुपर्नेमा व्यवस्थापन प्रतिवद्ध भएको बताए ।

कलेजमा कार्यरत चिकित्सकले विनाकारण निष्कासन गरिएका चिकित्सकलाई तुरुन्त पुनःबहाली गर्नुपर्ने, श्रम ऐनअनुसार करार कर्मचारीलाई स्थायी गर्नुपर्ने, समयसापेक्ष तलब वृद्धि गर्नुपर्ने र महिना बितेको सात दिनभित्र तलब वितरण गर्नुपर्ने चारवटा माग राख्दै १५ दिनयता अस्पतालमा आकस्मिक बाहेकका सेवा बन्द गर्दै आएका छन् ।